കൊയിലാണ്ടി പന്തലായനി അഘോര ശിവക്ഷേത്രത്തിൽ പ്രതിഷ്ഠാദിന ആഘോഷങ്ങളുടെ ഭാഗമായി ഗുരുവായൂർ ദേവസ്വം കലാകാരന്മാർ അവതരിപ്പിച്ച കൃഷ്ണനാട്ടം ഭക്തജനങ്ങൾക്ക് നവ്യാനുഭവമായി. നൂറുകണക്കിന് വിശ്വാസികളാണ് ഈ അപൂർവ്വ കലാരൂപം കാണാനായി ക്ഷേത്രസന്നിധിയിൽ തടിച്ചുകൂടിയത്.
ഏകദേശം 130 വർഷങ്ങൾക്ക് മുൻപ് ഈ ക്ഷേത്രത്തിൽ കൃഷ്ണനാട്ടം അരങ്ങേറിയതായി ചരിത്രരേഖകളിൽ പരാമർശമുണ്ട്. അന്ന് കേരളത്തിലെ പ്രമുഖ സാംസ്കാരിക നായകർ ഉൾപ്പെടെയുള്ളവർ ഈ കലാരൂപം കാണാൻ എത്തിയിരുന്നുവെന്നത് ഈ ക്ഷേത്രത്തിന്റെ സാംസ്കാരിക പാരമ്പര്യം വിളിച്ചോതുന്നു.
പ്രതിഷ്ഠാദിന ആഘോഷങ്ങളുടെ ഭാഗമായി വിവിധ പരിപാടികളാണ് ക്ഷേത്രത്തിൽ സംഘടിപ്പിച്ചിരിക്കുന്നത്. മെയ് 17-ന് വൈകീട്ട് ഭജനയും തിരുവാതിരക്കളിയും നടന്നു. മെയ് 18-ന് സന്തോഷ് കൈലാസും ശിഷ്യന്മാരും അവതരിപ്പിക്കുന്ന സോപാനസംഗീതം അരങ്ങേറും.
മെയ് 19-ന് രാവിലെ തന്ത്രി പാടേരി ഇല്ലത്ത് നാരായണൻ നമ്പൂതിരിപ്പാടിന്റെ മുഖ്യകാർമികത്വത്തിൽ പ്രതിഷ്ഠാദിന പൂജകൾ നടക്കും. തുടർന്ന് ഉച്ചയ്ക്ക് പ്രസാദഊട്ടും വൈകീട്ട് നിറമാലയും ഭജനയും ഉണ്ടായിരിക്കും. ഭക്തിസാന്ദ്രമായ അന്തരീക്ഷത്തിലാണ് ക്ഷേത്രത്തിലെ ആഘോഷങ്ങൾ പുരോഗമിക്കുന്നത്.
Photo and News Source: Mathrubhumi
