എറണാകുളം നഗരത്തിലെ പ്രമുഖ ആഡംബര ഹോട്ടലിലെ ബാർ റെസ്റ്റോറന്റിൽ ഡി.ജെ പാർട്ടിക്കിടെയുണ്ടായ സംഘർഷത്തിൽ നാല് പേർക്കെതിരെ കടവന്ത്ര പൊലീസ് കേസെടുത്തു. ഐ.ടി പ്രൊഫഷണലുകൾ ഉൾപ്പെടെയുള്ളവർക്കെതിരെയാണ് നടപടി സ്വീകരിച്ചിരിക്കുന്നത്. മദ്യപിക്കുന്നതിനിടെ രണ്ട് സംഘങ്ങൾ തമ്മിലുണ്ടായ വാക്കേറ്റമാണ് ഒടുവിൽ വലിയ സംഘർഷത്തിലും അടിപിടിയിലും കലാശിച്ചത്.
ഈ ഏറ്റുമുട്ടലിനിടെ ബാറിലെ വലിയൊരു ഭാഗം വസ്തുവകകൾ നശിച്ചു. ഏകദേശം 15,000 രൂപയുടെ മദ്യവും, 10,000 രൂപ വിലമതിക്കുന്ന ക്രിസ്റ്റൽ ഗ്ലാസുകളും, 50,000 രൂപയുടെ ടേബിൾ സോഫാ സെറ്റുമാണ് തകർക്കപ്പെട്ടത്. സംഘർഷം നിയന്ത്രിക്കാൻ ശ്രമിച്ച ബാറിലെ ബൗൺസർമാർക്ക് നേരെയും അക്രമികൾ കൈയേറ്റം നടത്തി.
സംഭവം അറിഞ്ഞ് കടവന്ത്ര എസ്.ഐയുടെ നേതൃത്വത്തിലുള്ള പൊലീസ് സംഘം സ്ഥലത്തെത്തിയപ്പോഴേക്കും അക്രമികൾ അവിടെ നിന്നും രക്ഷപ്പെട്ടിരുന്നു. ബാർ മാനേജർ നൽകിയ പരാതിയുടെ അടിസ്ഥാനത്തിൽ തിരിച്ചറിഞ്ഞ നാല് പേർക്കെതിരെയാണ് നിലവിൽ കേസെടുത്തിരിക്കുന്നത്. സംഭവത്തിൽ കൂടുതൽ അന്വേഷണം നടന്നു വരികയാണ്.
Photo and News Source: Kerala Kaumudi
