മന്ത്രിസഭാ രൂപീകരണ ചർച്ചകൾ പുരോഗമിക്കുന്നതിനിടെ, പുതിയ ഫോർമുലയുമായി നിയുക്ത മുഖ്യമന്ത്രി വി.ഡി. സതീശൻ രംഗത്തെത്തിയിരിക്കുകയാണ്. രമേശ് ചെന്നിത്തലയ്ക്ക് ആഭ്യന്തര വകുപ്പ് നൽകുകയാണെങ്കിൽ, തനിക്ക് ധനവകുപ്പ് വേണമെന്ന കർശന നിലപാടാണ് സതീശൻ സ്വീകരിച്ചിരിക്കുന്നത്. ആഭ്യന്തര വകുപ്പിൽ രമേശ് ചെന്നിത്തല കടുംപിടിത്തം തുടരുന്ന സാഹചര്യത്തിലാണ് ഇത്തരമൊരു നിർദ്ദേശം മുന്നോട്ടുവെച്ചിരിക്കുന്നത്.
ആഭ്യന്തര വകുപ്പ് വിട്ടുകൊടുക്കുന്നതിൽ വി.ഡി. സതീശന് പൂർണ്ണ തൃപ്തിയില്ലെങ്കിലും, മുഖ്യമന്ത്രി സ്ഥാനം ലഭിക്കാത്തതിനെ തുടർന്ന് രമേശ് ചെന്നിത്തല പ്രകടിപ്പിക്കുന്ന അതൃപ്തി പരിഹരിക്കാനാണ് അദ്ദേഹം ശ്രമിക്കുന്നത്. എന്നാൽ, ആഭ്യന്തര വകുപ്പ് ലഭിച്ചില്ലെങ്കിൽ ധനകാര്യ വകുപ്പ് വിട്ടുവീഴ്ചയില്ലാതെ വേണമെന്ന നിലപാടിൽ സതീശൻ ഉറച്ചുനിൽക്കുകയാണ്. ആഭ്യന്തര വകുപ്പ് ലഭിക്കുകയാണെങ്കിൽ മന്ത്രിസഭയിൽ ചേരാൻ തയ്യാറാണെന്ന നിലപാടിലാണ് ചെന്നിത്തല.
സാധാരണഗതിയിൽ ആഭ്യന്തര വകുപ്പിന്റെ ചുമതല മുഖ്യമന്ത്രിമാർ തന്നെയാണ് കൈകാര്യം ചെയ്യാറുള്ളത്. മുൻകാലങ്ങളിൽ വി.എസ്. അച്യുതാനന്ദൻ മുഖ്യമന്ത്രിയായിരുന്നപ്പോൾ കോടിയേരി ബാലകൃഷ്ണന് ആഭ്യന്തര വകുപ്പ് നൽകിയതും, ഉമ്മൻചാണ്ടി തനിക്കെതിരെയുള്ള വിജിലൻസ് അന്വേഷണത്തെ തുടർന്ന് ആഭ്യന്തര വകുപ്പ് തിരുവഞ്ചൂർ രാധാകൃഷ്ണനും പിന്നീട് രമേശ് ചെന്നിത്തലയ്ക്കും കൈമാറിയതും ഇതിന് ഉദാഹരണങ്ങളാണ്. ഈ പശ്ചാത്തലത്തിൽ സതീശന്റെ പുതിയ ഫോർമുല രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കുകയാണ്.
Photo and News Source: Kerala Kaumudi Latest
