തിരഞ്ഞെടുപ്പിലെ കനത്ത പരാജയത്തിന് പിന്നാലെ പിണറായി വിജയനെ വീണ്ടും പ്രതിപക്ഷ നേതാവായി തിരഞ്ഞെടുത്തതിനെതിരെ സിപിഎം കൊല്ലം ജില്ലാ സെക്രട്ടറിയേറ്റ് യോഗത്തിൽ രൂക്ഷവിമർശനം. പുതുതലമുറയ്ക്ക് അവസരം നൽകുന്നതിന് പകരം പിണറായി വീണ്ടും നേതൃസ്ഥാനം ഏറ്റെടുത്തത് തെറ്റായ തീരുമാനമാണെന്ന് യോഗം വിലയിരുത്തി. തിരഞ്ഞെടുപ്പിലെ പരാജയത്തിന് പ്രധാന കാരണം പിണറായിയുടെ നേതൃത്വമാണെന്നും, പുതിയൊരു ടീമിനെയാണ് പാർട്ടി നയിക്കേണ്ടിയിരുന്നതെന്നും വിമർശകർ ചൂണ്ടിക്കാട്ടി.
മുഖ്യമന്ത്രിയായിരുന്ന കാലത്ത് പിണറായി വിജയൻ നടത്തിയ 'വീട്ടിൽ പോയി ചോദിക്ക്', 'ഡാഷ് മോനേ' തുടങ്ങിയ പരാമർശങ്ങൾ ജനങ്ങൾക്കിടയിൽ വലിയ അവമതിപ്പുണ്ടാക്കിയെന്ന് യോഗം കുറ്റപ്പെടുത്തി. ഇത്തരം ധാർഷ്ട്യം നിറഞ്ഞ പെരുമാറ്റം ജനങ്ങളെ പാർട്ടിയിൽ നിന്ന് അകറ്റാൻ കാരണമായി. കൂടാതെ, സംസ്ഥാന സെക്രട്ടറി എം.വി. ഗോവിന്ദന്റെ ഭാര്യയെ മത്സരിപ്പിച്ചത് തെറ്റായ സന്ദേശമാണ് നൽകിയതെന്നും യോഗത്തിൽ അഭിപ്രായമുയർന്നു.
പയ്യന്നൂരിലെ രക്തസാക്ഷി ഫണ്ട് വിവാദം, തളിപ്പറമ്പ് സ്ഥാനാർത്ഥി നിർണയം എന്നിവ യുഡിഎഫിന് വിജയിക്കാനുള്ള സാഹചര്യം ഒരുക്കി. വികസന പ്രവർത്തനങ്ങൾ നടന്നിട്ടും ഭരണവിരുദ്ധ തരംഗം തടയാൻ നേതൃത്വത്തിന് കഴിഞ്ഞില്ല. പാർട്ടിയുടെ ശക്തികേന്ദ്രങ്ങളിൽ പോലും വോട്ട് ചോർച്ചയുണ്ടായി എന്നത് ഗൗരവകരമാണ്. ന്യൂനപക്ഷ വിഭാഗങ്ങൾ പൂർണമായും ഇടതുമുന്നണിയെ കൈവിട്ടുവെന്നും, ജനവികാരം മനസ്സിലാക്കുന്നതിൽ സംസ്ഥാന നേതൃത്വം പരാജയപ്പെട്ടുവെന്നും യോഗം വിലയിരുത്തി.
Photo and News Source: Kerala Kaumudi Latest
