പിണറായി വിജയന് ശേഷം കേരളത്തിന്റെ മുഖ്യമന്ത്രിയായി വി ഡി സതീശൻ ചുമതലയേൽക്കുന്നു. എറണാകുളത്തെ ഒരു സാധാരണ വിദ്യാർത്ഥി നേതാവിൽ തുടങ്ങി, പറവൂരിന്റെ ജനപ്രതിനിധിയായും പ്രതിപക്ഷ നേതാവായും തിളങ്ങിയ സതീശന്റെ രാഷ്ട്രീയ ജീവിതം അങ്ങേയറ്റം പോരാട്ടങ്ങൾ നിറഞ്ഞതായിരുന്നു. അറുപത്തിയൊന്നാം വയസ്സിൽ കേരളത്തിന്റെ ഭരണസാരഥ്യം ഏറ്റെടുക്കുമ്പോൾ, കഠിനാധ്വാനത്തിന്റെയും നിശ്ചയദാർഢ്യത്തിന്റെയും വലിയൊരു ചരിത്രം അദ്ദേഹത്തിന് പിന്നിലുണ്ട്.
1964 മേയ് 31-ന് എറണാകുളം നെട്ടൂരിൽ വനം വകുപ്പ് ഉദ്യോഗസ്ഥനായ വടശേരി ദാമോദര മേനോന്റെയും വിലാസിനി അമ്മയുടെയും മകനായാണ് വി ഡി സതീശൻ ജനിച്ചത്. തേവര സേക്രട്ട് ഹാർട്ട് കോളേജ്, രാജഗിരി കോളേജ്, കേരള ലോ അക്കാദമി എന്നിവിടങ്ങളിലായി വിദ്യാഭ്യാസം പൂർത്തിയാക്കിയ അദ്ദേഹം, നിയമബിരുദധാരിയാണ്. ഏകദേശം പത്തുവർഷത്തോളം കേരള ഹൈക്കോടതിയിൽ അഭിഭാഷകനായി സേവനമനുഷ്ഠിച്ച ശേഷമാണ് അദ്ദേഹം പൂർണ്ണസമയ രാഷ്ട്രീയത്തിലേക്ക് ഇറങ്ങിത്തിരിച്ചത്.
വിദ്യാർത്ഥി രാഷ്ട്രീയത്തിലൂടെയാണ് സതീശൻ പൊതുരംഗത്ത് സജീവമായത്. എസ്എച്ച് കോളേജ് യൂണിയൻ ഭാരവാഹിയായും എംജി യൂണിവേഴ്സിറ്റി യൂണിയൻ ചെയർമാനായും എൻഎസ്യുഐ ദേശീയ സെക്രട്ടറിയായും അദ്ദേഹം പ്രവർത്തിച്ചു. ഈ അനുഭവങ്ങൾ അദ്ദേഹത്തിന്റെ രാഷ്ട്രീയ അടിത്തറ ശക്തമാക്കി. പിന്നീട് പറവൂരിന്റെ വികസന നായകനായി മാറിയ അദ്ദേഹം, രണ്ട് പതിറ്റാണ്ടിലേറെയായി ആ മണ്ഡലത്തെ നിയമസഭയിൽ പ്രതിനിധീകരിക്കുന്നു.
1996-ൽ പറവൂരിൽ ആദ്യമായി മത്സരിച്ചപ്പോൾ പരാജയം രുചിക്കേണ്ടി വന്നെങ്കിലും, 2001-ൽ തിരിച്ചുപിടിച്ച മണ്ഡലം പിന്നീട് അദ്ദേഹം വിട്ടുകൊടുത്തില്ല. സി.പി.ഐ നേതാവ് പി. രാജുവിനെ പരാജയപ്പെടുത്തി തുടങ്ങിയ വിജയയാത്ര, പിന്നീട് പന്ന്യൻ രവീന്ദ്രൻ, ശാരദ മോഹൻ തുടങ്ങിയ പ്രമുഖർക്കെതിരെയും തുടർന്നു. ഓരോ തവണയും ഭൂരിപക്ഷം വർദ്ധിപ്പിച്ചുകൊണ്ട് പറവൂരിന്റെ അനിഷേധ്യ നേതാവായി അദ്ദേഹം മാറി. പ്രതിപക്ഷ നേതാവെന്ന നിലയിൽ പിണറായി സർക്കാരിനെതിരെ നടത്തിയ ശക്തമായ ഇടപെടലുകളാണ് അദ്ദേഹത്തെ മുഖ്യമന്ത്രി പദത്തിലേക്ക് ഉയർത്തിയത്.
Photo and News Source: Kerala Kaumudi
