ബേസിൽ ജോസഫിന്റെ നിർമ്മാണത്തിൽ പുറത്തിറങ്ങിയ പുതിയ ചിത്രമായ 'അതിരടി'യുടെ പ്രധാന ഭാഗങ്ങൾ തിയേറ്ററിൽ നിന്ന് അനധികൃതമായി പകർത്തി ഇൻസ്റ്റാഗ്രാമിൽ പ്രചരിപ്പിക്കുന്നത് വലിയ വിവാദമാകുന്നു. ചിത്രത്തിലെ അതിഥി വേഷങ്ങൾ ഉൾപ്പെടെയുള്ള നിർണ്ണായക രംഗങ്ങൾ സ്പോയിലറുകളായി സോഷ്യൽ മീഡിയയിൽ എത്തിയതോടെ പ്രേക്ഷകർ കടുത്ത പ്രതിഷേധവുമായി രംഗത്തെത്തി.
ബേസിൽ ജോസഫിനൊപ്പം ടൊവിനോ തോമസും വിനീത് ശ്രീനിവാസനും പ്രധാന വേഷങ്ങളിലെത്തുന്ന ചിത്രം തിയേറ്ററുകളിൽ മികച്ച പ്രതികരണം നേടി മുന്നേറുന്നതിനിടയിലാണ് ഇത്തരമൊരു സംഭവം. തിയേറ്ററിൽ നിന്ന് റെക്കോർഡ് ചെയ്ത വീഡിയോ ക്ലിപ്പുകൾ ഷോർട്ട് വീഡിയോകളായി ഇൻസ്റ്റാഗ്രാമിൽ വ്യാപകമായി പ്രചരിക്കുകയാണ്. ഇത് സിനിമ കാണാൻ ആഗ്രഹിക്കുന്നവരുടെ ആവേശം കെടുത്തുന്നതാണെന്ന് പ്രേക്ഷകർ ചൂണ്ടിക്കാട്ടുന്നു.
'ഇതിലും ഭേദം സിനിമ മുഴുവനായി എടുത്തിടുന്നതല്ലേ' എന്ന് ചോദിച്ചുകൊണ്ട് നിരവധി പേരാണ് വിമർശനങ്ങളുമായി എത്തുന്നത്. നേരത്തെ 'വാഴ 2' എന്ന സിനിമയുടെ കാര്യത്തിലും സമാനമായ രീതിയിൽ ദൃശ്യങ്ങൾ പ്രചരിപ്പിക്കപ്പെട്ടിരുന്നു. ഇത്തരം പ്രവണതകൾ സിനിമയുടെ അണിയറ പ്രവർത്തകരുടെ അധ്വാനത്തെ അപമാനിക്കുന്നതാണെന്നും, കുറ്റക്കാർക്കെതിരെ കർശന നടപടി വേണമെന്നും സോഷ്യൽ മീഡിയയിൽ ആവശ്യമുയരുന്നു.
ചിത്രത്തിന്റെ നിർമ്മാതാക്കളായ ബേസിൽ ജോസഫ് എൻ്റർടൈൻമെൻ്റ്സ് ഇക്കാര്യം ശ്രദ്ധിക്കുന്നില്ലേ എന്നാണ് ആരാധകരുടെ ചോദ്യം. തിയേറ്ററുകളിൽ ഫോൺ ഉപയോഗിക്കുന്നത് കർശനമായി നിരോധിക്കണമെന്നും, മറ്റുള്ളവരുടെ സിനിമാസ്വാദനത്തെ ബാധിക്കുന്ന ഇത്തരം പ്രവർത്തികൾ അവസാനിപ്പിക്കണമെന്നും പ്രേക്ഷകർ ആവശ്യപ്പെടുന്നു. മിന്നൽ മുരളിയുടെ തിരക്കഥാകൃത്തായ അരുൺ അനിരുദ്ധ് സംവിധാനം ചെയ്ത ആദ്യ ചിത്രമാണ് 'അതിരടി'.
Photo and News Source: Asianet News
