യുഎസ് റീട്ടെയ്ൽ ഭീമനായ വാൾമാർട്ടിന്റെ പിന്തുണയുള്ള ഫ്ലിപ്പ്കാർട്ട് തങ്ങളുടെ പ്രാഥമിക ഓഹരി വില്പന (IPO) നീട്ടിവെക്കാൻ തീരുമാനിച്ചതായി റിപ്പോർട്ടുകൾ. 2027 സാമ്പത്തിക വർഷം അവസാനിക്കുന്നതിന് മുൻപായി കമ്പനിയെ പൂർണ്ണമായും ലാഭത്തിലെത്തിക്കുക എന്ന ലക്ഷ്യത്തിനാണ് ഇപ്പോൾ മുൻഗണന നൽകുന്നത്. ഈ തീരുമാനത്തിന് പിന്നാലെ കമ്പനിയുടെ ദീർഘകാല വളർച്ചാ പദ്ധതികൾക്ക് കൂടുതൽ ഊന്നൽ നൽകാനാണ് വാൾമാർട്ടിന്റെ നിർദ്ദേശം.
വാൾമാർട്ട് പ്രസിഡന്റും സിഇഒയുമായ ജോൺ ഫർണർ അടുത്തിടെ ബെംഗളൂരുവിലെത്തി ഫ്ലിപ്പ്കാർട്ട് ഡയറക്ടർ ബോർഡ് അംഗങ്ങളുമായി ചർച്ചകൾ നടത്തിയിരുന്നു. ഈ കൂടിക്കാഴ്ചയിലാണ് ഐപിഒ നടപടികൾ തൽക്കാലം മാറ്റിവെക്കാൻ തീരുമാനമായത്. വാൾമാർട്ടിന്റെ നിക്ഷേപമുള്ള മറ്റൊരു പ്രമുഖ സ്ഥാപനമായ ഫോൺപേയും സമാനമായ രീതിയിൽ ഐപിഒ നടപടികൾ നേരത്തെ നീട്ടിവെച്ചിരുന്നു.
ഇന്ത്യയിലെ തങ്ങളുടെ നിക്ഷേപങ്ങളിൽ നിന്ന് പെട്ടെന്ന് ലാഭമെടുത്ത് പുറത്തുകടക്കാൻ വാൾമാർട്ടിന് ധൃതിയില്ലെന്നാണ് ഈ നീക്കങ്ങൾ വ്യക്തമാക്കുന്നത്. ഫ്ലിപ്പ്കാർട്ടിൽ 80 ശതമാനവും ഫോൺപേയിൽ 71.8 ശതമാനവും ഓഹരി പങ്കാളിത്തമാണ് വാൾമാർട്ടിനുള്ളത്. ദീർഘകാലാടിസ്ഥാനത്തിൽ കമ്പനികളുടെ മൂല്യം വർദ്ധിപ്പിക്കാനാണ് അവർ ലക്ഷ്യമിടുന്നത്.
അതേസമയം, ഫ്ലിപ്പ്കാർട്ടിന്റെ സാമ്പത്തിക പ്രകടനം മെച്ചപ്പെട്ടുവരികയാണ്. 2025 സാമ്പത്തിക വർഷത്തിൽ കമ്പനി 1,494.2 കോടി രൂപയുടെ നഷ്ടമാണ് രേഖപ്പെടുത്തിയത്. മുൻ സാമ്പത്തിക വർഷം ഇത് 2,358.7 കോടി രൂപയായിരുന്നു. നഷ്ടത്തിൽ 37 ശതമാനത്തോളം കുറവ് വരുത്താൻ കമ്പനിക്ക് സാധിച്ചത് വലിയ നേട്ടമായാണ് വിലയിരുത്തപ്പെടുന്നത്.
Photo and News Source: Dhanam
