കേരളം സാമ്പത്തികമായി പാപ്പരായ അവസ്ഥയിലാണെന്ന മുതിർന്ന കോൺഗ്രസ് നേതാവ് എ.കെ. ആന്റണിയുടെ പ്രസ്താവനയ്ക്ക് മറുപടിയുമായി മുൻ ധനമന്ത്രി കെ.എൻ. ബാലഗോപാൽ രംഗത്തെത്തി. സംസ്ഥാനത്തിന്റെ ധനസ്ഥിതി മെച്ചപ്പെട്ടതാണെന്നും, ഇക്കാര്യത്തിൽ ആന്റണിക്ക് തെറ്റിദ്ധാരണകൾ ഉണ്ടെന്നും അദ്ദേഹം പറഞ്ഞു. ആന്റണി സമയം അനുവദിക്കുകയാണെങ്കിൽ നേരിട്ട് കണ്ട് വസ്തുതകൾ ബോധ്യപ്പെടുത്താൻ താൻ തയ്യാറാണെന്നും ബാലഗോപാൽ വ്യക്തമാക്കി.
കഴിഞ്ഞ പത്ത് വർഷമായി സജീവ രാഷ്ട്രീയത്തിൽ ഈ കാര്യങ്ങൾ കൃത്യമായി നിരീക്ഷിക്കാത്തതുകൊണ്ടാകാം ആന്റണിക്ക് ഇത്തരം തെറ്റായ ധാരണകൾ ഉണ്ടായതെന്ന് ബാലഗോപാൽ ചൂണ്ടിക്കാട്ടി. നിലവിൽ 6000 കോടി രൂപയുടെ ക്യാഷ് ബാലൻസ് സംസ്ഥാനത്തിനുണ്ടെന്നും, ഡി.എ. കുടിശിക മാത്രമാണ് ഇനി നൽകാനുള്ളതെന്നും അദ്ദേഹം അവകാശപ്പെട്ടു. മറ്റ് എല്ലാ പദ്ധതികൾക്കുമുള്ള തുക ഇതിനകം നൽകിക്കഴിഞ്ഞതായും അദ്ദേഹം കൂട്ടിച്ചേർത്തു.
കേരളത്തിന്റെ ധനസ്ഥിതി മെച്ചപ്പെട്ടതാണെന്ന് ബോധ്യമുള്ളതുകൊണ്ടാണ് തിരഞ്ഞെടുപ്പ് പ്രകടനപത്രികയിൽ അഞ്ചിന ഗ്യാരണ്ടികൾ നൽകാൻ വി.ഡി. സതീശന് ധൈര്യം വന്നതെന്നും ബാലഗോപാൽ പറഞ്ഞു. ആന്റണിയുടെ പ്രസ്താവന വാഗ്ദാനങ്ങൾ നടപ്പിലാക്കാൻ കഴിയാത്ത സാഹചര്യം മുൻകൂട്ടി കണ്ടുകൊണ്ടുള്ള ഒരു 'മുൻകൂർ ജാമ്യം' എടുക്കലാണോ എന്ന് സംശയിക്കേണ്ടിയിരിക്കുന്നു എന്നും അദ്ദേഹം അഭിപ്രായപ്പെട്ടു.
നേരത്തെ, 2001-ൽ താൻ മുഖ്യമന്ത്രിയായിരുന്ന കാലത്തെ സമാനമായ സാമ്പത്തിക പ്രതിസന്ധിയാണ് ഇപ്പോഴുമുള്ളതെന്നായിരുന്നു എ.കെ. ആന്റണിയുടെ പരാമർശം. തുടക്കത്തിൽ തന്നെ ജനപ്രിയ പ്രഖ്യാപനങ്ങൾ പ്രതീക്ഷിക്കരുതെന്നും, സംസ്ഥാനത്തെ കരകയറ്റാൻ വി.ഡി. സതീശന് ആവശ്യമായ സാവകാശം നൽകണമെന്നും അദ്ദേഹം മാധ്യമങ്ങളോട് പറഞ്ഞിരുന്നു.
Photo and News Source: Mathrubhumi
