കേരളത്തിലെ കോൺഗ്രസ് രാഷ്ട്രീയത്തിൽ പുതിയ മുഖ്യമന്ത്രിയുടെ സ്ഥാനാരോഹണവുമായി ബന്ധപ്പെട്ട ചർച്ചകൾ സജീവമാകുന്നതിനിടെ, മുതിർന്ന നേതാക്കളെ അനുനയിപ്പിക്കാനുള്ള നീക്കവുമായി ഹൈക്കമാന്റ് പ്രതിനിധി ദീപാ ദാസ് മുൻഷി രംഗത്തെത്തി. രമേശ് ചെന്നിത്തലയുമായി നേരിട്ട് സംസാരിക്കുമെന്നും, പാർട്ടിയിലെ എല്ലാവരും ഒത്തൊരുമയോടെ മുന്നോട്ട് പോകുമെന്നും അവർ വ്യക്തമാക്കി.
പുതിയ നേതാവിനെ തെരഞ്ഞെടുക്കുന്നതുമായി ബന്ധപ്പെട്ട് മാധ്യമങ്ങളിൽ പ്രചരിക്കുന്ന എം.എൽ.എമാരുടെ പിന്തുണയുടെ കണക്കുകൾ അടിസ്ഥാനരഹിതമാണെന്ന് ദീപാ ദാസ് മുൻഷി തിരുവനന്തപുരത്ത് പറഞ്ഞു. "എം.എൽ.എമാരുടെ പിന്തുണ സംബന്ധിച്ച കണക്കുകൾ ഔദ്യോഗികമല്ല. എല്ലാ എം.എൽ.എമാരും മുഖ്യമന്ത്രിയെ നിശ്ചയിക്കാനുള്ള ചുമതല ഹൈക്കമാന്റിനെയാണ് ഏൽപ്പിച്ചത്. പാർട്ടിയിൽ ഭിന്നതകളില്ല, എല്ലാവരും ഒറ്റക്കെട്ടായി നിൽക്കും," അവർ കൂട്ടിച്ചേർത്തു.
മുഖ്യമന്ത്രി സ്ഥാനത്തേക്ക് കെ.സി. വേണുഗോപാലിന്റെ പേര് പരിഗണിക്കപ്പെട്ടിരുന്നുവെങ്കിലും, ഇതിൽ അദ്ദേഹത്തിന് അതൃപ്തിയുണ്ടെന്ന വാർത്തകളെ ദീപാ ദാസ് മുൻഷി പൂർണ്ണമായും തള്ളി. കെ.സി. വേണുഗോപാലിന് യാതൊരുവിധ മാനസിക വ്യഥയുമില്ലെന്നും അദ്ദേഹം സന്തുഷ്ടനാണെന്നും അവർ വ്യക്തമാക്കി. രാഷ്ട്രീയത്തിൽ മുന്നോട്ട് പോകാൻ അദ്ദേഹത്തിന് ഇനിയും ധാരാളം സമയമുണ്ടെന്നും, അദ്ദേഹത്തിന് നിരാശയില്ലെന്നും ദീപ പറഞ്ഞു.
സംസ്ഥാനത്ത് ഉടൻ സർക്കാർ രൂപീകരിക്കുന്നതിനുള്ള നടപടികൾ ആരംഭിക്കുമെന്ന് അവർ അറിയിച്ചു. ഇതിനായി ഗവർണറെ ഉടൻ കാണും. മന്ത്രിസഭാ രൂപീകരണത്തിന് മുന്നോടിയായി യു.ഡി.എഫിലെ മറ്റ് ഘടകകക്ഷികളുമായും ചർച്ചകൾ നടത്തുമെന്നും അവർ വ്യക്തമാക്കി. രമേശ് ചെന്നിത്തലയെ നേരിട്ട് കണ്ട് സംസാരിക്കുന്നതോടെ നിലവിലുള്ള ചെറിയ അസ്വാരസ്യങ്ങൾ കൂടി പരിഹരിക്കപ്പെടുമെന്നാണ് ഹൈക്കമാന്റിന്റെ പ്രതീക്ഷ.
Photo and News Source: Suprabhaatham
