രാജ്യത്തെ വോട്ടർപട്ടിക സമഗ്രമായി പരിഷ്കരിക്കുന്നതിന്റെ (SIR) മൂന്നാംഘട്ട നടപടികൾക്ക് കേന്ദ്ര തിരഞ്ഞെടുപ്പ് കമ്മീഷൻ തുടക്കമിട്ടു. 16 സംസ്ഥാനങ്ങളിലും മൂന്ന് കേന്ദ്രഭരണ പ്രദേശങ്ങളിലുമാണ് ഈ ഘട്ടത്തിൽ പരിശോധന നടക്കുന്നത്. സെൻസസ് നടപടികൾക്കൊപ്പം തന്നെ വോട്ടർപട്ടിക പരിഷ്കരണവും പൂർത്തിയാക്കുകയാണ് കമ്മീഷന്റെ ലക്ഷ്യം. 3.94 ലക്ഷം ബൂത്ത് ലെവൽ ഓഫീസർമാർ (BLO) ഈ പ്രക്രിയയിൽ പങ്കാളികളാകും. ഏകദേശം 36.73 കോടി വോട്ടർമാരെ നേരിൽ സന്ദർശിച്ച് വിവരങ്ങൾ ശേഖരിക്കാനാണ് തീരുമാനം. രാഷ്ട്രീയ പാർട്ടികൾ നിയമിക്കുന്ന 3.42 ലക്ഷം ബൂത്ത് ലെവൽ ഏജന്റുമാരുടെ (BLA) സഹായവും ഇതിനായി ലഭ്യമാക്കും.
അർഹരായ എല്ലാ വോട്ടർമാരെയും പട്ടികയിൽ ഉൾപ്പെടുത്തുകയും, മരണപ്പെട്ടവരോ താമസം മാറിയവരോ ആയ അയോഗ്യരെ പട്ടികയിൽ നിന്ന് ഒഴിവാക്കുകയുമാണ് ഈ പരിഷ്കരണത്തിലൂടെ ലക്ഷ്യമിടുന്നത്. കാലാവസ്ഥാ സാഹചര്യങ്ങളും സെൻസസ് നടപടികളും പരിഗണിച്ച് ഹിമാചൽ പ്രദേശ്, ലഡാക്ക്, കാശ്മീർ എന്നിവിടങ്ങളിൽ പിന്നീട് തീയതി പ്രഖ്യാപിക്കും. നേരത്തെ അസം, ബംഗാൾ, കേരളം, യുപി തുടങ്ങിയ സംസ്ഥാനങ്ങളിൽ എസ്ഐആർ നടപടികൾ ആരംഭിച്ചിരുന്നു. കേരളത്തിൽ കരട് വോട്ടർപട്ടിക ഈ മാസം 23-ന് തന്നെ പ്രസിദ്ധീകരിക്കുമെന്ന് കമ്മീഷൻ വ്യക്തമാക്കിയിട്ടുണ്ട്.
അതേസമയം, വിവിധ സംസ്ഥാനങ്ങളിൽ എസ്ഐആർ നടപടികളുമായി ബന്ധപ്പെട്ട് ഉദ്യോഗസ്ഥർക്ക് മേൽ സമ്മർദ്ദം ഏറുന്നതായി പരാതി ഉയർന്നിട്ടുണ്ട്. ഇതിനിടെ, ഉത്തർപ്രദേശ് ഉൾപ്പെടെയുള്ള അഞ്ച് സംസ്ഥാനങ്ങളിലും ഒരു കേന്ദ്രഭരണ പ്രദേശത്തും ഫോം സമർപ്പിക്കാനുള്ള സമയപരിധി കമ്മീഷൻ ഒരാഴ്ച കൂടി നീട്ടി നൽകി. ഉത്തർപ്രദേശിൽ കരട് പട്ടിക പ്രസിദ്ധീകരിക്കുന്നത് ഡിസംബർ 31-ലേക്ക് മാറ്റിയിട്ടുണ്ട്. എന്നാൽ, പശ്ചിമ ബംഗാളിന്റെ സമാനമായ ആവശ്യം കമ്മീഷൻ തള്ളിക്കളഞ്ഞു.
എസ്ഐആർ നടപടികൾക്കിടെ ചില സംസ്ഥാനങ്ങളിൽ ബിഎൽഒമാർ ആത്മഹത്യ ചെയ്ത സംഭവങ്ങൾ വലിയ ചർച്ചകൾക്ക് വഴിവെച്ചിട്ടുണ്ട്. രാജ്യസഭയിൽ ഈ വിഷയം ഭരണ-പ്രതിപക്ഷ വാക്പോരിനും കാരണമായി. ബിജെപി ഭരണത്തിൽ എല്ലാ പാർട്ടികൾക്കും തുല്യ അവസരം നിഷേധിക്കപ്പെടുന്നുവെന്ന് കോൺഗ്രസ് നേതാവ് അജയ് മാക്കൻ ആരോപിച്ചു. എന്നാൽ, ജനങ്ങളുമായി ആഴത്തിലുള്ള ബന്ധം സ്ഥാപിക്കുന്നതിൽ പരാജയപ്പെട്ടതാണ് പ്രതിപക്ഷത്തിന്റെ തിരിച്ചടിക്ക് കാരണമെന്ന് ബിജെപി തിരിച്ചടിച്ചു.
Photo and News Source: Media Mangalam
