തന്റെ പുതിയ ചിത്രമായ 'മൈസ'യുടെ ഷൂട്ടിങ്ങിനായി കേരളത്തിലെത്തിയ പ്രമുഖ നടി രശ്മിക മന്ദാന പങ്കുവെച്ച ഇൻസ്റ്റാഗ്രാം പോസ്റ്റ് ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുകയാണ്. കൊച്ചിയെക്കുറിച്ച് രശ്മിക കുറിച്ച വരികളാണ് ആരാധകർക്കിടയിൽ കൗതുകമുണർത്തുന്നത്. കൊച്ചിയിലെ കാടുകളെക്കുറിച്ചും വെള്ളച്ചാട്ടങ്ങളെക്കുറിച്ചും താരം വാചാലയായെങ്കിലും, യഥാർത്ഥത്തിൽ താരം പങ്കുവെച്ച ചിത്രങ്ങൾ അതിരപ്പിള്ളിയുടേതായിരുന്നു.
'കൊച്ചിയിൽ എന്ത് മാത്രം കാടുകളാണ്! പ്രാണികളും വെള്ളച്ചാട്ടങ്ങളും ട്രക്കിങ്ങും വർക്ക് ഔട്ടും മഴയും ഓട്ടവും ആക്ഷൻ പഠിക്കലും എല്ലാം നന്നായി പോകുമെന്ന് പ്രതീക്ഷിക്കുന്നു. ഈ പരിസരത്തുകൂടി നടക്കുമ്പോൾ എല്ലാവരും ശ്രദ്ധിക്കണം. പിന്നെ കുറച്ച് പഴംപൊരി കഴിക്കാൻ, അല്ല കുറച്ചേറെ കഴിക്കാൻ. അത്രയേ ഉള്ളൂ' എന്ന് കുരങ്ങന്റെ ഇമോജിക്കൊപ്പം രശ്മിക കുറിച്ചു. എന്നാൽ, കൊച്ചിയിൽ കാടുകളോ വെള്ളച്ചാട്ടങ്ങളോ ഇല്ലെന്നും താരം ഉദ്ദേശിച്ചത് അതിരപ്പിള്ളിയെയാണെന്നും മലയാളികൾ കമന്റുകളിലൂടെ ചൂണ്ടിക്കാട്ടി.
ആരാധകരുടെ തിരുത്തലുകൾക്ക് പിന്നാലെ രശ്മിക തന്നെ മറുപടിയുമായി രംഗത്തെത്തി. 'അതെ, ചിത്രങ്ങൾ അതിരപ്പിള്ളിയിൽ നിന്നുള്ളതാണ്. ഞങ്ങൾ കൊച്ചിയിലും തൃശൂരിലുമായാണ് ചിത്രീകരണം നടത്തിയത്' എന്ന് താരം വ്യക്തമാക്കി. ഷൂട്ടിങ്ങിനിടയിലെ തന്റെ അനുഭവങ്ങളും ഉയരങ്ങളോടുള്ള പേടിയെ നേരിട്ടതും പഴംപൊരിയോടുള്ള ഇഷ്ടവുമെല്ലാം താരം പോസ്റ്റിൽ പങ്കുവെച്ചിരുന്നു. രശ്മികയുടെ ഈ രസകരമായ പോസ്റ്റ് ഇപ്പോൾ സിനിമാ ലോകത്ത് വലിയ ശ്രദ്ധ നേടിയിരിക്കുകയാണ്.
Photo and News Source: Samakalika Malayalam
