ടിവി9 നെറ്റ്വർക്ക് സംഘടിപ്പിക്കുന്ന കോർപ്പറേറ്റ് ബാഡ്മിന്റൺ ചാമ്പ്യൻഷിപ്പ് 2026-ന്റെ രണ്ടാം ദിനം അതീവ ആവേശത്തോടെ പുരോഗമിക്കുന്നു. ഐടി മേഖലയിലെയും മറ്റ് പ്രമുഖ കോർപ്പറേറ്റ് സ്ഥാപനങ്ങളിലെയും ജീവനക്കാർ തങ്ങളുടെ കായിക മികവ് തെളിയിക്കുന്ന കാഴ്ചയാണ് കോർട്ടിൽ കാണാനായത്. ദിവസവും ലാപ്ടോപ്പിന് മുന്നിൽ ജോലി ചെയ്യുന്ന ടെക് വിദഗ്ധർ ബാഡ്മിന്റൺ കോർട്ടിൽ മികച്ച പ്രകടനമാണ് കാഴ്ചവെക്കുന്നത്.
മൈക്രോസോഫ്റ്റ്, ആമസോൺ, ഡെലോയിറ്റ്, ടിസിഎസ്, ഇൻഫോസിസ് തുടങ്ങിയ പ്രമുഖ കമ്പനികളിൽ നിന്നുള്ള മത്സരാർത്ഥികൾ ടൂർണമെന്റിൽ മാറ്റുരയ്ക്കുന്നുണ്ട്. ഇതിഹാസ താരം പുല്ലേല ഗോപിചന്ദിന്റെ മേൽനോട്ടത്തിൽ നടക്കുന്ന ഈ ടൂർണമെന്റ് കോർപ്പറേറ്റ് ജീവനക്കാർക്കിടയിൽ കായികക്ഷമതയും ആവേശവും വളർത്തുക എന്ന ലക്ഷ്യത്തോടെയാണ് സംഘടിപ്പിച്ചിരിക്കുന്നത്.
രണ്ടാം ദിനത്തിലെ മത്സരങ്ങളിൽ മിക്സഡ് ഡബിൾസ് വിഭാഗത്തിലും സിംഗിൾസ് വിഭാഗത്തിലും നിരവധി താരങ്ങൾ അടുത്ത റൗണ്ടിലേക്ക് മുന്നേറി. സായ് തേജ-ഹരിത സഖ്യം, പ്രണവ് ജെയിൻ-അനുജ ദാസ്, അനിൽ കുമാർ-ഗൗരി ഡാൽ തുടങ്ങിയവർ തങ്ങളുടെ മത്സരങ്ങളിൽ മികച്ച വിജയം നേടി. ആമസോൺ, ടിസിഎസ്, ഇൻഫോസിസ് തുടങ്ങിയ കമ്പനികളെ പ്രതിനിധീകരിക്കുന്ന താരങ്ങളും ക്വാർട്ടർ ഫൈനലിലേക്കും അടുത്ത റൗണ്ടുകളിലേക്കും യോഗ്യത നേടിയിട്ടുണ്ട്.
ടൂർണമെന്റ് ഇപ്പോൾ നിർണ്ണായക ഘട്ടത്തിലേക്ക് കടക്കുകയാണ്. ക്വാർട്ടർ ഫൈനലും സെമി ഫൈനലും വരാനിരിക്കെ, കിരീടം ആര് സ്വന്തമാക്കുമെന്ന ആകാംക്ഷയിലാണ് കായിക പ്രേമികൾ. കോർപ്പറേറ്റ് ലോകത്തെ സമ്മർദ്ദങ്ങൾക്കിടയിൽ ഇത്തരം കായിക മത്സരങ്ങൾ ജീവനക്കാർക്ക് വലിയ ഉന്മേഷമാണ് പകരുന്നത്.
Photo and News Source: TV9 Malayalam
