പെട്രോൾ, ഡീസൽ വിലവർദ്ധനവ് സാധാരണക്കാരെ വലയ്ക്കുമ്പോൾ ആശ്വാസകരമായ വാർത്തയുമായി ടാറ്റ മോട്ടോഴ്സ് രംഗത്ത്. പെട്രോളിന് പകരമായി 100 ശതമാനം എഥനോളിൽ (E100) പ്രവർത്തിക്കുന്ന ഫ്ലെക്സ് ഫ്യുവൽ കാറുകൾ ഇന്ത്യൻ വിപണിയിൽ അവതരിപ്പിക്കാൻ കമ്പനി തയ്യാറെടുക്കുന്നു. പരിസ്ഥിതി സൗഹൃദവും ചെലവ് കുറഞ്ഞതുമായ ഇന്ധന മാർഗ്ഗങ്ങൾ പ്രോത്സാഹിപ്പിക്കാനുള്ള കേന്ദ്ര സർക്കാരിന്റെ നയത്തിന്റെ ഭാഗമായാണ് ഈ മാറ്റം.
2026 അവസാനത്തോടെയോ 2027 തുടക്കത്തിലോ ടാറ്റയുടെ ആദ്യ ഫ്ലെക്സ് ഫ്യുവൽ വാഹനം നിരത്തിലെത്തുമെന്നാണ് റിപ്പോർട്ടുകൾ. ന്യൂഡൽഹിയിൽ നടന്ന ഭാരത് മൊബിലിറ്റി എക്സ്പോയിൽ ടാറ്റ പഞ്ച് ഫ്ലെക്സ് ഫ്യുവൽ പതിപ്പിന്റെ പ്രോട്ടോടൈപ്പ് കമ്പനി പ്രദർശിപ്പിച്ചിരുന്നു. പെട്രോൾ, എഥനോൾ മിശ്രിതം, അല്ലെങ്കിൽ 100 ശതമാനം ശുദ്ധമായ എഥനോൾ എന്നിവയിൽ ഒരേപോലെ പ്രവർത്തിക്കാൻ ഈ എഞ്ചിനുകൾക്ക് സാധിക്കും.
ടാറ്റ മോട്ടോഴ്സ് പാസഞ്ചർ വെഹിക്കിൾസ് എം.ഡിയും സി.ഇ.ഒയുമായ ശൈലേഷ് ചന്ദ്രയാണ് ഈ സുപ്രധാന വിവരം പങ്കുവെച്ചത്. പഞ്ച് എസ്യുവിയിലോ നെക്സോണിലോ ആയിരിക്കും ഈ സാങ്കേതികവിദ്യ ആദ്യം അവതരിപ്പിക്കുക എന്ന് കരുതപ്പെടുന്നു. എഥനോൾ ഇന്ധനത്തിന് അന്തരീക്ഷത്തിലെ ഈർപ്പം വലിച്ചെടുക്കാൻ ശേഷിയുള്ളതിനാൽ, സാധാരണ പെട്രോൾ എഞ്ചിനുകളിൽ മാറ്റങ്ങൾ വരുത്തിയാണ് ഈ സാങ്കേതികവിദ്യ സജ്ജമാക്കുന്നത്. ഇതോടെ ഇന്ധനച്ചെലവിൽ വലിയ കുറവ് വരുത്താൻ ഉപഭോക്താക്കൾക്ക് സാധിക്കും.
Photo and News Source: DriveSpark
