കൊച്ചിയിൽ പൊലീസ് ഉദ്യോഗസ്ഥരെന്ന വ്യാജേന യുവാവിനെ ആക്രമിച്ചു പണം കവർന്ന കേസിലെ മുഖ്യപ്രതിയെ എറണാകുളം സൗത്ത് പൊലീസ് അറസ്റ്റ് ചെയ്തു. മട്ടാഞ്ചേരി എം.എ.ആർ റോഡ് പുത്തൻവീട്ടിൽ ഷക്കി അൻവർ (36) ആണ് പിടിയിലായത്. ജനുവരി 24-ന് രാത്രിയായിരുന്നു സംഭവം നടന്നത്.
ഓൺലൈൻ ഭക്ഷണ വിതരണക്കാരനായ കർണാടക ദക്ഷിണ കന്നഡ സ്വദേശി ഷാഹിദ് അഫ്രിദ് (28) ആണ് കവർച്ചയ്ക്ക് ഇരയായത്. പഴയ വെണ്ടുരുത്തി പാലത്തിന് സമീപം വെച്ച് യുവാവിന്റെ സ്കൂട്ടർ കേടായതിനെ തുടർന്ന് സുഹൃത്തിനെ കാത്തുനിൽക്കുമ്പോഴാണ് പ്രതികൾ എത്തിയത്. പൊലീസ് ഉദ്യോഗസ്ഥരാണെന്ന് തെറ്റിദ്ധരിപ്പിച്ചാണ് ഇവർ യുവാവിനെ സമീപിച്ചത്.
തുടർന്ന് ഷക്കി അൻവർ യുവാവിനെ ദേഹോപദ്രവം ഏൽപ്പിക്കുകയും കൈകൾ പിന്നോട്ട് കെട്ടിപ്പിടിക്കുകയും ചെയ്തു. ഈ സമയം കൂടെയുണ്ടായിരുന്ന മറ്റ് പ്രതികൾ യുവാവിന്റെ പേഴ്സിൽ നിന്ന് 3200 രൂപ കവർച്ച ചെയ്യുകയായിരുന്നു. സംഭവത്തിന് ശേഷം പ്രതികൾ സ്ഥലത്തുനിന്ന് കടന്നുകളഞ്ഞു.
പ്രതികളുടെ സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് മുഖ്യപ്രതിയെ പിടികൂടാനായത്. എറണാകുളം സൗത്ത് എസ്.എച്ച്.ഒ എം.ബി. രാജേഷ്, എസ്.ഐ ആദർശ് എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. മറ്റ് പ്രതികൾക്കായി അന്വേഷണം ഊർജിതമാക്കിയിട്ടുണ്ട്.
Photo and News Source: Kerala Kaumudi
