സമൂഹമാധ്യമങ്ങളുടെ അതിപ്രസരത്തിനിടയിലും പുതിയ എഴുത്തുകാരുടെ കടന്നുവരവ് വലിയ പ്രതീക്ഷയാണ് നൽകുന്നതെന്ന് പ്രശസ്ത എഴുത്തുകാരൻ ബെന്യാമിൻ അഭിപ്രായപ്പെട്ടു. മാതൃഭൂമി ആഴ്ചപ്പതിപ്പും വനം-വന്യജീവി വകുപ്പും സംയുക്തമായി തേക്കടി ബാംബു ഗ്രോവിൽ സംഘടിപ്പിച്ച 'അക്ഷര പ്രകൃതി' സാഹിത്യ ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സാഹിത്യത്തിൽ ലഭിക്കുന്ന തിരസ്കരണങ്ങളെയും ക്രിയാത്മകമായി സ്വീകരിക്കാൻ നവാഗതർ തയ്യാറാകണമെന്ന് അദ്ദേഹം ഓർമ്മിപ്പിച്ചു.
പുതിയ കാലത്തിന്റെ ഭാഷയും എഴുത്തിന്റെ രീതികളും മനസ്സിലാക്കാൻ വായന അനിവാര്യമാണെന്നും, ഇതിന് മറ്റ് കുറുക്കുവഴികളില്ലെന്നും ബെന്യാമിൻ വ്യക്തമാക്കി. ഭാഷയെ ജീവിതവുമായി ആഴത്തിൽ ബന്ധിപ്പിക്കുമ്പോഴാണ് മികച്ച കൃതികൾ പിറക്കുന്നത്. ചിലപ്പോൾ മികച്ച സൃഷ്ടികൾ പോലും തിരസ്കരിക്കപ്പെട്ടേക്കാം. അത്തരം സന്ദർഭങ്ങളിൽ തളരാതെ, അതിൽനിന്ന് പാഠങ്ങൾ ഉൾക്കൊണ്ട് സ്വയം മെച്ചപ്പെടാൻ ശ്രമിക്കണം. ആരെയും അനുകരിക്കാതെ സ്വന്തമായ ശൈലിയും ഇടവും കണ്ടെത്താൻ യുവ എഴുത്തുകാർ ശ്രദ്ധിക്കണമെന്നും അദ്ദേഹം കൂട്ടിച്ചേർത്തു.
ചടങ്ങിൽ ക്യാമ്പ് ഡയറക്ടറും എഴുത്തുകാരനുമായ സുഭാഷ് ചന്ദ്രൻ ആമുഖപ്രഭാഷണം നടത്തി. വാക്കുകൾക്കൊപ്പം പ്രകൃതിയെയും കാടിനെയും അടുത്തറിയാൻ ഈ ക്യാമ്പ് സഹായിക്കുമെന്ന് അദ്ദേഹം പറഞ്ഞു. പെരിയാർ കടുവ സങ്കേതം ഫീൽഡ് ഡയറക്ടർ പി.പി. പ്രമോദ് അധ്യക്ഷത വഹിച്ച ചടങ്ങിൽ ചീഫ് വൈൽഡ് ലൈഫ് വാർഡൻ ഡോ. പ്രമോദ് ജി. കൃഷ്ണൻ മുഖ്യാതിഥിയായി പങ്കെടുത്തു. വിവിധ വകുപ്പ് ഉദ്യോഗസ്ഥരും മാതൃഭൂമി പ്രതിനിധികളും ചടങ്ങിൽ സംസാരിച്ചു.
മാതൃഭൂമി വിഷുപ്പതിപ്പിന്റെ ഭാഗമായി കോളേജ് വിദ്യാർഥികൾക്കായി നടത്തിയ കഥ, കവിതാ മത്സരങ്ങളിൽ വിജയികളായ 50 പേരാണ് ഈ സാഹിത്യ ക്യാമ്പിൽ പങ്കെടുക്കുന്നത്. ആലങ്കോട് ലീലാകൃഷ്ണൻ, ജെ. പ്രമീളാ ദേവി, കണിമോൾ തുടങ്ങിയ പ്രമുഖർ ക്യാമ്പിൽ ക്ലാസുകൾ നയിച്ചു. ശനിയാഴ്ച വിവിധ സെഷനുകളിലായി പ്രമുഖ എഴുത്തുകാർ പങ്കെടുക്കുന്ന സംവാദങ്ങളും പാനൽ ചർച്ചകളും നടക്കും. ഞായറാഴ്ച സമാപിക്കുന്ന ക്യാമ്പ്, നവാഗത എഴുത്തുകാർക്ക് സാഹിത്യലോകത്തേക്ക് കരുത്തുറ്റ ചുവടുവെപ്പുകൾ നടത്താൻ സഹായകമാകും.
Photo and News Source: Mathrubhumi
