താരസംഘടനയായ ‘അമ്മ’യ്ക്കുള്ളിൽ നിലനിൽക്കുന്ന ആഭ്യന്തര തർക്കങ്ങളും അധികാര ദുർവിനിയോഗവും പരസ്യമായി വെളിപ്പെടുത്തി നടനും എക്സിക്യൂട്ടീവ് അംഗവുമായ ടിനി ടോം. കൊച്ചിയിൽ വിളിച്ചുചേർത്ത വാർത്താസമ്മേളനത്തിൽ, സംഘടനയെ നയിക്കാൻ അറിവില്ലാത്തവരുടെ ഇടപെടലുകളാണ് പ്രതിസന്ധികൾക്ക് കാരണമെന്ന് അദ്ദേഹം തുറന്നടിച്ചു. മുൻ ജനറൽ സെക്രട്ടറി ഇടവേള ബാബുവും എക്സിക്യൂട്ടീവ് അംഗം കൈലാഷും അദ്ദേഹത്തോടൊപ്പം ഉണ്ടായിരുന്നു.
സംഘടനയുടെ ട്രഷറർ ഭരണപരമായ കാര്യങ്ങളിൽ അനാവശ്യമായി ഇടപെട്ടുവെന്ന് ടിനി ടോം ആരോപിച്ചു. ട്രഷററുടെ ജോലി എന്താണെന്ന് അദ്ദേഹത്തിന് മനസ്സിലായിട്ടുണ്ടാകില്ലെന്ന് ഉണ്ണി ശിവപാലിനെ ലക്ഷ്യമാക്കി അദ്ദേഹം പറഞ്ഞു. സംഘടനയിലെ ജീവനക്കാരി ഉന്നയിച്ച തൊഴിൽ പീഡന പരാതിയുടെ പേരിൽ ട്രഷററോട് നിർബന്ധിത അവധിയിൽ പോകാൻ പ്രസിഡന്റ് ഉൾപ്പെടെയുള്ളവർ നിർദ്ദേശിച്ചിരുന്നു. ഈ സംഭവവികാസങ്ങളാണ് പുതിയ വിവാദങ്ങൾക്ക് തിരികൊളുത്തിയത്.
അഡ്മിനിസ്ട്രേഷൻ എന്താണെന്ന് അറിയാത്തവരുടെ ഇടപെടലുകളാണ് സംഘടനയെ പ്രതിസന്ധിയിലാക്കിയതെന്ന് ടിനി ടോം വ്യക്തമാക്കി. ഇടവേള ബാബുവിനെപ്പോലെയുള്ളവർ മാറിയ ശേഷം സംഘടന മുന്നോട്ടുകൊണ്ടുപോകാൻ വലിയ ബുദ്ധിമുട്ടുകൾ നേരിട്ടുവെന്നും അദ്ദേഹം പറഞ്ഞു. സംഘടനയുടെ ഘടന മറ്റുള്ളവരിൽ നിന്ന് വ്യത്യസ്തമാണെന്നും, അതിനാൽ മറ്റ് സംഘടനകളുടെ രീതികൾ ഇവിടെ പ്രായോഗികമല്ലെന്നും അദ്ദേഹം കൂട്ടിച്ചേർത്തു. വരും വർഷങ്ങളിൽ സീനിയർ താരങ്ങളുടെ സഹായത്തോടെ പ്രശ്നങ്ങൾ പരിഹരിക്കാൻ ശ്രമിക്കുമെന്നും അദ്ദേഹം അറിയിച്ചു.
ജോയിന്റ് സെക്രട്ടറി സ്ഥാനത്തുനിന്ന് അൻസിബ രാജിവെച്ചതിനെക്കുറിച്ചുള്ള ചോദ്യത്തിന്, അത് വ്യക്തിപരമായ തിരക്കുകൾ മൂലമാണെന്നായിരുന്നു ടിനി ടോമിന്റെ മറുപടി. ജീവനക്കാരിയെ പിരിച്ചുവിട്ട നടപടി നിയമവിരുദ്ധമാണെന്ന് കണ്ടെത്തിയതിനാലാണ് അത് റദ്ദാക്കിയതെന്നും അദ്ദേഹം വിശദീകരിച്ചു. ബൈലോ പ്രകാരം ജനറൽ സെക്രട്ടറിക്കാണ് പൂർണ്ണ അധികാരമെന്നും, എന്നാൽ നിലവിൽ പ്രസിഡന്റ് വെറും സ്റ്റാമ്പ് മാത്രമായി മാറിയെന്നും അദ്ദേഹം കുറ്റപ്പെടുത്തി. സംഘടന അന്യാധീനപ്പെട്ടു പോകരുത് എന്ന ലക്ഷ്യത്തോടെയാണ് താൻ എക്സിക്യൂട്ടീവ് കമ്മിറ്റിയിലേക്ക് മത്സരിച്ചതെന്നും ടിനി ടോം വ്യക്തമാക്കി.
Photo and News Source: Media Mangalam
