ലോക ആസ്ത്മ ദിനം 2026-നോടനുബന്ധിച്ച് ആസ്ത്മ ചികിത്സയിലെ പ്രധാന വെല്ലുവിളികളെക്കുറിച്ച് ആരോഗ്യവിദഗ്ധർ മുന്നറിയിപ്പ് നൽകുന്നു. ആസ്ത്മയെ കേവലം ലക്ഷണങ്ങൾ കുറയ്ക്കാനുള്ള ഒരു താൽക്കാലിക ചികിത്സയായി മാത്രം കാണുന്നത് തെറ്റായ പ്രവണതയാണെന്ന് പൾമനോളജിസ്റ്റ് ഡോ. ഹരി ലക്ഷ്മണൻ പി വ്യക്തമാക്കി. രോഗലക്ഷണങ്ങൾ അനുഭവപ്പെടുമ്പോൾ മാത്രം ഇൻഹേലർ ഉപയോഗിക്കുന്ന രീതി പലരിലും കണ്ടുവരുന്നുണ്ടെന്നും ഇത് രോഗത്തെ പൂർണ്ണമായി നിയന്ത്രിക്കുന്നതിൽ തടസ്സമാകുന്നുണ്ടെന്നും അദ്ദേഹം ചൂണ്ടിക്കാട്ടി.
ഡോക്ടർമാർ നിർദ്ദേശിക്കുന്ന കൺട്രോളർ ഇൻഹേലറുകൾ കൃത്യമായ ഇടവേളകളിൽ ഉപയോഗിക്കാത്തത് ഇന്ത്യയിലെ ആസ്ത്മ രോഗികളുടെ ആരോഗ്യസ്ഥിതിയെ പ്രതികൂലമായി ബാധിക്കുന്നുണ്ട്. ആസ്ത്മ എന്നത് ദീർഘകാലം നീണ്ടുനിൽക്കുന്ന ഒരു രോഗാവസ്ഥയാണ്. അതിനാൽ, ലക്ഷണങ്ങൾ കുറയ്ക്കുന്നതിലുപരി, ശ്വാസകോശത്തിലെ വീക്കം കുറയ്ക്കുന്നതിനുള്ള സ്ഥിരമായ ആന്റി-ഇൻഫ്ലമേറ്ററി ചികിത്സയാണ് രോഗികൾക്ക് അത്യാവശ്യമെന്ന് വിദഗ്ധർ ഓർമ്മിപ്പിക്കുന്നു.
ഇൻഹേലറുകളെക്കുറിച്ചുള്ള അനാവശ്യമായ ഭയവും തെറ്റിദ്ധാരണകളും രോഗനിർണയത്തിലെ കാലതാമസവും ആസ്ത്മ ചികിത്സയിലെ പ്രധാന വെല്ലുവിളികളായി തുടരുന്നു. ഈ സാഹചര്യത്തിലാണ് ബോധവത്കരണത്തിനും കൃത്യമായ രോഗനിർണയത്തിനും പ്രാധാന്യം നൽകിക്കൊണ്ട് ബ്രിത്ത്ഫ്രീ (Breathfree) സംരംഭം പ്രവർത്തിക്കുന്നത്. ഡൽഹിയിലും മുംബൈയിലും ആരംഭിച്ച ബ്രിത്ത്ഫ്രീ ലംഗ് വെൽനസ് സെൻററുകൾ വഴി ആസ്ത്മ രോഗികൾക്ക് മികച്ച പിന്തുണയും ചികിത്സാ മാർഗ്ഗനിർദ്ദേശങ്ങളും ലഭ്യമാക്കുന്നുണ്ട്.
Photo and News Source: Sathyam Online
